Geguritan tema "katresnan"

1. Andheng-andheng ireng

Andheng-andheng ireng

Pratandha kang marai kangen

Kangen yen sedina wae ora nyawang

Nyawang sliramu sing nduweni andheng-andheng ireng

Andheng-andheng ireng pener ing ngisor paningalan
Paningal sisih tengen sing marakake tentrem
Yen disawang ngilangake rasa kemrungsung
Naging yen kok sawang ndadekake atiku njerit njaluk tulung
Nanging sapa sing bisa nulung?
Namung atiku lan atimu kang padha jejeritan
Jerit bisu, sing ana namung pandheng-pandhengan

2. Atiku linu 

Ana sing beda Iki atiku ngopo?
Rasane linu nanging ora pendhak dina
Namung ing wayah tartamtu
Wayahe uga ora kaya ngombe jamu
Apa maneh kaya sholat limang wektu
Namung saklerapan
Nanging ndadekake penggalihku nganti seminggu ora ilang

Rasane linu, pancen linu 

Nanging linu kuwi sing saben dina tak antu-antu 

Yen sedina wae penyakit linu kuwi ora teka 

Saawak rasane kelara-lara 

3. Namung sepisan iki 

Sepisan iki wae 

Aja lunga 

Namung sepisan 

Kowe lungguha

Aku ora arep njaluk apa-apa 

Sanajan atiku kelara-lara 

Nanging meksa ora gelem polah 

Mripatku ora gelem obah 

Mandhengi sliramu sing sajege iki isih wigati ing atiku 

Namung sepisan iki wae 

Sadurunge kowe wigati kanggo wong liya 

Sadurunge aku salah yen nduweni pangrasa 

Sadurunge kowe lunga ngertiya 

Dina iki, kowe isih sing wigati