Geguritan

1.  Saka adoh

Saka adoh

Tak sawang nganggo atiku

Saka adoh tak sawang kabeh kaluwihanmu

Saka adoh aku ora preduli marang lamunku

Saya adoh

Aku sadhar yen kowe kuwi pancen adoh

2.  Mendhung durung mesti udan

Tak enteni tekamu

Nganti lintang metu jam 12 awan

Nganti macan malih mangan gegodhongan

Nganti kucing lan tikus ora maneh tukaran

Tak enteni tekamu

Sanajan bulan lan srengenge ora mungkin metu bebarengan

Sanajan kembar mayang wis padha sesandhingan

Sanajan manuk-manuk pating nrocok maido apa kang tak tandhang

Nanging aku tetep ngenteni

Amarga

Mendhung durung mesthi udan

Kembar mayang ora mungkin digathukke karo godhong gedhang

Lan montor ora bakal mlaku yen diisi banyu wedang

3.  Kowe sapa

Sing tak kangeni

Sanajan durung tau weruh rupane

Sanajan durung tau weruh manis eseme

Sing pendhak dina tak sebut ana ing pandongaku

Sanajan durung ngerti sapa jenengmu

Sing isih ngusahake gawe aku

Rampungna urusanmu

Yen wancine wis teka

Tresna bakal nuntun kowe marang aku

Kanggomu

Jodho sing isih disimpen Gusti kanggo aku

4.  Ngenteni netesing watu

Kaya ngenteni netesing watu

Rina wengi tak antu-antu

Ora ngerti papan kang tinuju

Ketemu wong namung entuk paido

Marga rana rene ora ana kasile

Sing digolek ora ana juntrunge

Sing dienteni ora ana karepe

Sing ana namung mega ing wayah sore