Geguritan

1.       Kuwi dolanan apa tenanan ?

Wujude ngono cilik

Nanging isine sadonya ana

Namung tunyuk rana tunyuk rene

Pagaweyane kaya dene dolanan

Nanging kok ya tenanan

Saka barang kang cilik iki bisa ngowahi kadadeyan

Sing becik bisa teka

Nanging ora dinyana sing memala uga asring teka

Barang cilik kuwi

Kang biyasane sinebut HP

Kadigdayane sekti mandraguna

Kaya-kaya saisi donya bisa diatur ing pucuking asta

Ragane padha anteng mandhengi kaca kang arupa-rupa

Nanging sapa ngerti sukmane tekan negara manca

Yen tak kira

Dhukun saiki wis ora payu

Kalah kondhang lan digdaya karo monopoline donya

2.       Telepon tunyuk

Ing jaman saiki

HP kuwi dadi piranti kang wigati

Piranti kang sekti

Butuh apa bae kabeh dijabani

Pucuking driji dadi sarana kang pesthi

Butuh blanja ?

Namung nunyuk toko pedia

Butuh lunga ?

Tunyuka traveloka

Butuh mangan ?

Golekana nomer 14022

Kabeh barang padha mara

Nanging dhuwit tetep paling utama

3.  Ngertiya nduk cah ayu

Ngertiya nduk cah ayu                                  

Kae Rama Biyungmu kerja golek guyu

Namung kanggo awakmu

Kanggo nuruti gaya metropolitanmu

Ngertimu namung njaluk dhuwit kanggo tuku paket internet

Ngertiya Rama Biyungmu sedina muput dleweran kringet

Namung ngerti njaluk wedak lan gincu

Rama Biyungmu saben dina gluprut lemah lan watu

Ngertiya sandhanganmu kuwi

Regane ora cukup sedina rong dina bayarane Rama Biyungmu

Ngertiya nduk cah ayu