Ringkesan crita "Singkar"

Judhul          : Singkar

Karangan     : Siti Aminah

Lampahan ing panguripan manungsa

Crita kang nduweni judhul Singkar iki pantes diwaca kanggo para mudha amarga nyritakake kahanan urip kang maneka warna. Iya perkara katresnan, kulawarga, masyarakat uga kahanan kang ana ing pendhidhikan. Kabeh iki mau dikemas ana ing sajroning crita kang nrenyuhake, uga nduweni amanat kanggo sing maca.

            Jejodhonan kang ora dikarepake Narumi amarga dipeksa karo ibune njalari Narumi nglampiaske marang anake, Nina. Kahanan iki kang njalari Nina minggat saka omah, amarga dheweke wis duwe pilihan dhewe kanggo pacangan uripe. Pancen bab omah-omah kuwi ora bisa dipilihake wong liya sanajan kuwi wong tuwane dhewe, amarga kudu didhasari rasa katresnan supaya ora kapedhotan ing tengah dalan. nalika jamane Narumi, anak perawan kang wis lulus SMP langsung dinikahake karo wong sing wis dipilihake wong tuwane. Nanging beda karo jamane Nina kang wis saya modern, ditambah maneh pendhidhikane Nina sing S1, mesthi wae dheweke milih kanthi mateng babagan pacangan urip.

            Kabeh wong tuwa mesthi pengen sing paling apik gawe anak, ora ana wong tuwa kok terus nyilakani anak. Sanajan anak seneng wong tuwa melu seneng, nanging nalika anak susah sabisaa wong tuwa melu ngrewangi. Iki uga kang ana ing pikirane Narumi, dheweke pengen anak perawan siji-siji kuwi entuk pacangan kang apik, gemati, sregep, lan kabeh kuwi mau tumuju ing Kurniawan. Nanging anake ora bisa nrima pangarep ibune amarga dheweke wis duwe pilihan yaiku Nusa, kanca kuliahe.

            Kabeh wong kuwi bisa berubah dadi kang luwih apik, kalebu Nusa. Nanging kasunyatan getir kang pernah dialami Nusa 2 taun kepengker, ndadekake srimpet ing sesambungane marang Nina. Amarga dheweke wis duwe anak jalaran pacaran sing keblabasen. Saka kaluputan kuwi dheweke janji bakal tanggung jawab, nanging ora direstuni karo wong tuwa pacangane. Kadadeyan iki kang gawe Nusa manut marang wong tuwane lan ora bakal tumindhak nekat maneh.

Kabeh kadadeyan kang wis kelakon kuwi bisa dadi guru kanggo manungsa supaya ngerti babagan apik lan ala, uga aja nganti mbaleni kaluputan kang wis ditindhakake. Saiki Nusa lila nglakoni urip ing Singkar. Desa cilik kang durung makmur, tetandhuran wae ora ana sing urip ing mangsa ketiga. Nanging dheweke pengen bantu para warga supaya kabutuhan pangan tetep kacukupan ing mangsa ketiga. Tani ing desa Singkar dikeki penyuluhan babagan tetanduran sing apik lan diajak gawe program irigasi kanggo sawah-sawah.

Semana uga kang dilakoni Kurniawan, nom-noman kang sregep ngrewangi wong tuwane ana kebon salak, lan gaweyan apa wae ana ngomah kang kudu ditandhangi wong lanang. Nalika ngerti bapake duwe wedhokan liya kang njalari pisah karo ibune,  dheweke tambah sregep anggone ngewangi ibune. Nganti ora ngurusi awake dhewe, sing penting isa mbantu ibune golek pangan lan mbayar sekolah adhine.

Kabeh kadadeyan kang dilakoni Nina, Nusa, kurniawan lan Narumi mau bisa ndadekake rusake hubungan marang anak,wong tuwa utawa pacangane. Mula crita iki bisa dadi guru kanggo sing maca supaya ngati-ati anggone tumindhak. Amarga tumindhak kang ora dipikir dhisik bisa gawe larane ati wong liya.