Maesa Sura
Kirab Kebo Bule utawa maesa sura inggih menika tradhisi
ingkang taksih kalampahan wonten ing Keraton Surakarta Hadiningrat. Adicara
menika dipunlampahi nalika warsa enggal Hijriyah utawi wulan Sura. Kirab menika
inggih dipunlampahi kangge mengeti dumadinipun kutha Surakarta nalika Keraton
dipunpindhah saking Kartasura tumuju ing Surakarta. Ingkang kala semanten
dipunpimpin kaliyan maesa kasebat.
Adicara kirab menika dipunlampahi tengah wengi utawi
miturut kekarepan saking Kebo Bule keturunan Kyai Slamet. Miturut abdi dalem
Keraton Surakarta, Kebo Bule menika jelmaan saking para leluhur. Kebo ingkang
cacahipun 11 kasebat nggadhahi kulit warna albino, mula kathah ingkang mastani
Kebo Bule. Adicara kirab menika dipunwiwiti saking Keraton Surakarta
Hadiningrat, alun-alun lajeng dumugi ing Keraton malih.
Piranti wonten ing kirab kasebat boten namung maesa
kemawon, nanging uga wonten pusaka ingkang dipunbekta para abdi dalem, pusaka
kasebat inggih menika keris lan tombak. Para abdi dalem uga nglampahi tapa
bisu, yaiku boten dhahar, sare lan gunem ngantos dumugi enjang. Rituwal kasebat
ancasipun kangge ngrenungi kalepatan ingkang sampun kalampahan setaun
kepengker. Wonten syarat ingkang kedah dipunlampahi saderengipun kirab menika,
antawisipun ngagem rasukan ingkang warninipun cemeng, ngagem samir lan boten
pareng ngagem sandal.
Wonten ingkang unik ing adicara menika, saderengipun adicara
kirab, Kebo menika dipunparingi kopi ireng ingkang taksih panas sarta dhaharan
ingkang dipunremeni kadosta tigan mentah, tela, gedhang lan kangkung. Kebo kasebat uga dipunagemi sangsangan sekar
mlati. Para warga ingkang mirsani sami rebutan sisa saking kopi ireng lan
dhaharan kebo ingkang boten telas, janur, sekar ngantos wonten ingkang mundhut
regedan saking kebo bule menika. Warga pitaya yen piranti-piranti kasebat bisa
ndhatengaken kaberkahan.
Tradhisi ingkang
sampun kalampahan watawis 250 taun menika taksih dipunjagi ngantos dinten
samenika. Nilai kesakralan dados daya tarik kagem masyarakat Solo lan sanesipun.
Kathah warga saking dhaerah sanes kagem mirsani kirab menika. Mitos ingkang
nyebar wonten ing masyarakat njalari tradhisi kasebat taksih wonten ngantos
dinten samenika.
Urut-urutaning adicara Kirab Kebo Bule inggih menika:
Gambar 1. Nyiapaken piranti-piranti kangge jamuan Kebo Bule
Gambar 2. 3. Kebo Bule dhahar lan dipunagemi sangsangan
Gambar 4. Kebo Bule ingkang mimpin kirab
Gambar 5. Barisan
pusaka lan abdi dalem ingkang nglampahi tapa bisu
Gambar 6. Para warga sami rebutan supados bisa ngaras lan mundhut sekar utawi dhaharan ssia Kebo Bule Kasebat
Tidak ada komentar:
Posting Komentar