Unnes

Umure Unnes wis setengah abad

Kamis (5/3) 2015 wiwit jam 7 esuk,  ing lapangan lari FIK (Fakultas Ilmu Keolahragaan) katon kaya segara manungsa. Ewonan wong ana ing kono padha melu acara pembukaan Dies Natalis utawa Ulang Tahun Unnes kang wis umur setengah abad. Mahasiswa, dhosen, pejabat Unnes lan tamu undangan tumpleg bleg ana ing kono. Pengisi acara uga ora kalah akehe, ana penari kolosal kang cacahe ana 250 penari saka Mahasiswa PAUD (Pendidikan Anak Usia Dini), kolaborasi BEM (Badan Eksekutif Mahasiswa) lan Mahasiswa FIS (Fakultas Ilmu Sosial), formasi huruf saka Mahasiswa Bidikmisi kang kawaca Unnus 50th lan liya-liyane.

            Ulang Tahun Unnes kaping 50 Tahun iki mboyong  tema “Konservasi Unggul”. “semoga unnes menjadi kampus konservasi unggul dan menjadi contoh bagi kampus-kampus lain di Indonesia” pangandikane Rektor Unnes, Prof. Dr. Fathur Rakhman, M.Hum sadurunge ngempakake sirine gawe tanda acara iki dibukak. Ana maneka warna acara kanggo ngrayakake Dies Natalis, nganti suwene kurang luwih sesasi, saka acara jurusan tekan Universitas. Upacara penutupan dianakake Tanggal 30 Maret, lan ditutup karo pagelaran ringgit Tanggal 2 April ana ing auditorium kang didhalangi Ki Mantep Sudarsana kang nduweni julukan dhalang setan.

            Sauwise Upacara Pembukaan, diterusake jalan sehat tekan auditorium. Mahasiswa padha baris miturut Fakultase dhewe-dhewe karo nggawa atribut kang rupa-rupa supaya katon rame. Saben wong entuk jatah kupon undian siji gawe ngrebutake hadiah kang maneke warna, ana 15 sepeda gunung, 3 mesin cuci, 3 kulkas, voucher pesawat Garuda Indonesia tekan Surabaya lan hadiah utama 2 sepeda motor. Ing kono uga ana pasar tugu kang ngadol jajanan, klambi lan gantungan kunci.

            Upacara pembukaan Dies Natalis lan jalan sehat iki rampung jam 1 awan. Kuliah dimulai maneh jam 11 awan, sanajan wis mundur 2 jam. Saliyane kanggo ngrayakake Ulang Tahun Unnes, Mahasiswa uga bisa padha refresing lan ora sepaneng anggone mikir kuliah amarga kuliah lagi wae diwiwiti 2 Maret kepengker. Sauwise preinan karo tengah sasi, Mahasiswa bisa padha temu kangen lan guyon karo kanca-kanca maneh disambi jalan sehat tekan auditorium.