Geguritan

1.  Kenya lugu

Crita kenya kang ora patiya ayu

Mangkat sekolah ngluru ilmu

Pangarep-arepe supaya ora dadi babu

Uga bisa ngewangi Bapak lan Ibu

Pancen dhasare bocah kang lugu

Diapusi wedokan juragan ciu

Jarene arep diwengku

Nanging omongane ora kena dipitaya

Jebule didadeke wanita

Wanita kang wis ora sampurna

2.  Limangewu rupiah

Rungakna pitik-pitik wis padha mapan aning kandhange

Mega wis angslup sawalike segara gedhe

Bocah-bocah padha njagong ing serambi langgar

Ngadhep dampar sinambi nderes Qur’an

Swara adzan wis padha ngumandhang

Wis ora ana wong kang nyambut gawe

Kabeh wis padha mlebu omahe

Nglerenke awak sing njarem sakabehane

Nanging Mbah Darso durung ketingal aning ngomah

Isih ngider golek ewonan rupiah

Kanggo nyukupi panguripan kang saya suwe saya mblandrah

Nanging kasile ora punjul saka limangewu rupiah

3.  Urip kang migunani

Urip kuwi ora salawase

Kabeh aji nalika ing wayahe

Yen wayahe ganti, kabeh ora ana ajine

Kang maune disunggi

Saiki ngglasar ora ana sing preduli

Yen wis ngono kuwi

Apa kang bisa katindhakake

Pontang panting ora ana genahe

Saya suwe ilang kapangan mangsane

Saora-orane urip kuwi kudu migunani

Nduweni aji kanggo wong liya

Supaya ora muspro yen wancine wis teka